இலங்கையின் சமாதான முயற்சியில் நோர்வே ஏன் தோல்வியடைந்தது?

அதேவேளை தோல்வியடைந்த இலங்கையின் சமாதான முயற்சிகள் தொடர்பாக ஆராய நியமிக்கப்பட்ட குழுவின் அறிக்கையில் மேலும் பலதரப்பட்ட நிகழ்வுகள் மற்றும் சம்பவங்களும் குறிப்பிடப்பட்டுள்ளது. இதில் குறிப்பாக இந்தியாவின் செல்வாக்கும், சமாதான முயற்சிகள் உடைந்துபோக இந்தியா எவ்வாறு காரணமாக இருந்தது என்பது குறித்தும்  இந்த அறிக்கையில் கூறப்பட்டுள்ளது.

இலங்கையின் உள்நாட்டு இன முரண்பாட்டுக்கு உள்ளக ரீதியிலான தீர்வொன்றை காண முடியாத நிலையேற்பட்டபோது இந்தியா இலங்கை விவகாரங்களில் தலையிட ஆரம்பித்தது. அதன் தலையீடு காரணமாக உருவானதே இந்திய இலங்கை ஒப்பந்தமாகும்.

காலப்போக்கில் இந்திய இலங்கை ஒப்பந்தமானது தனது இலக்கை எட்டமுடியாமல் போகவே இன முரண்பாடனது சர்வதேசம் செல்வாக்குச் செலுத்தும் விவகாரமாகியது.

இனமுரண்பாடுகள் கூர்மையடைந்த நாடுகளில் சர்வதேசத்தின் மத்தியஸ்தம் அல்லது தலையீடு என்பது தவிர்க்க முடியாததாகியபோது இலங்கையும் அதில் புகவேண்டிய கட்டாயத்திற்கு தள்ளப்பட்டது.

அந்த வகையில்  இலங்கை விவகாரத்தில் அமெரிககா உள்ளிட்ட வல்லரசு நாடுகளின் ஆசியுடன் நோர்வே தன்னை முழுமையாக ஈடுபடுத்த ஆரம்பித்தது. அதன் பயனாக அன்றைய பிரதமராகவிருந்த ரணில் விக்கிரமசிங்கவுக்கும், புலிகளின் தலைவர் பிரபாகரனுக்குமிடையே போர் நிறுத்த ஒப்பந்தம் கைசாத்திடப்பட்டது.

ஓப்பந்தம் குறித்து அப்போது நிறைவேற்றதிகாரத்தை தன்வசம் கொண்டிருந்த சந்திரிக்கா குமாரதுங்க தலைமையிலான பொதுஜன ஐக்கிய முன்னணி, சிஙகள் கடுப்போக்குவாதிகள் மற்றும் மாற்று தமிழ் இயக்கங்கள் கடுமையாக விமர்சனங்களை மேற்கொண்டபோதும் அவற்றை செவிமடுக்காத நேர்வே போர்நிறுத்த ஒப்பந்தத்தில் கைச்சாத்திட்ட ரணிலும் பிரபாகாரனும் அதில் உறுதியை பேண வேண்டுமென்பதில் விடாப்பிடியாக இருந்தது.

இதன் காரணமாக நோர்வே பலதரப்பட்ட உதவிகளை ரணில் விக்கிரமசிங்க தலைமையிலான அரசாங்கத்திற்கும், பிரபாகரன் தலைமையிலான அரசாங்கத்திற்கு தாராளமாக வழங்கியது. குறிப்பாக இந்த போர்நிறுத்த ஒப்பந்தத்தை தமக்கு சார்பாக பயன்படுத்துவதில் ரணில் விக்கிரமசிஙகவும், பிரபாகரனும் அதீத ஆர்வத்தை வெளிப்படுத்தினர்.

இதனால் இனநெருக்கடிக்கு அரசியல் தீர்வு காணப்பட வேண்டுமென்ற உயர் நோக்கத்திற்கு அப்பால் தமது நலன்கள் நிறைவேற்றப்பட வேண்டுமென இருதரப்பினரும் முயற்சிகளை மேற்கொண்டனர். இதனால் போர்நிறுத்த ஒப்பந்தம் மீறப்படுவதாக இருதரப்பினரும் பரஸ்பரம் குற்றம்சுமத்தினர்.

இங்கு சிங்கள ஊடகங்கள் புலிகள் போர் நிறுத்த ஒப்பந்தத்தை மீறுவதாக குற்றம் சுமத்தியதைபபோன்றே, தமிழ் ஊடகங்கள் தென்னிலங்கை ரணில் அரசாங்கமும் அரச படைகளும் போர்நிறுத்த ஒப்பந்தத்தை மீறுவதாக குற்றம்சுமத்தின.

இதனால் சிங்கள, தமிழ் மற்றும் முஸ்லிம் மக்களிடையே போர்நிறுத்த ஒப்பந்தம் குறித்து சந்தேகங்களும், நம்பிக்கையீனமும் ஏற்படத்தொடங்கியது.

இந்நிலையில்தான் ஜனாதிபதி சந்திரிக்கா குமாரதுங்க ரணில் விக்கிரமசிங்க தலைமையிலான அரசாங்கத்தை கலைத்தார். இது மற்றுமொரு பாராளுமன்றத் தேர்தலுக்கு வழிவகுத்தது. அந்தத் தேர்தலில் ரணில் விக்கிரமசிங்க தலைமையிலான அரசாங்கம் தோல்வியை தழுவியது. இதனால் ரணில் பிரபா ஒப்பந்தம் தேக்கநிலை அடைந்தது.

இருந்த போதும் சர்வதேச சமூகத்தின் அச்சுறுத்தல் மற்றும் உதவிகளை காரணம் காட்டி சந்திரிக்காவோ அல்லது மஹிந்த ராஜபக்ஸவோ போர் நிறுத்த ஒப்பந்தத்தை ரத்துச் செய்யாமலிப்பதற்காக நோர்வே கடும் பிரயத்தனம் மேற்கொண்டது. ஆனாலும் அரசாங்கம் மற்றும் புலிகளுக்கிடையே சந்தேகம் தலைவிரித்தாடிய நிலையில போர் நிறுத்த ஒப்பந்தம் என்பது எந்நேரத்திலும் முறிவடைந்துவிடும் என்ற நிலைதோன்றி, அவ்வாறே மஹிந்த ராஜபக்ஸ ஜனாதிபதியாக பதவியேற்றதும் போர் நிறுத்த ஒப்பந்தம் முறிவடைந்து, கண்காணிப்பு பணயிலிருந்தும் நோர்வே விலகி, இறுதிக்கட்ட யுத்தமும் ஏற்பட்டு அதில் புலிகள் இராணுவ ரீதியிலான தோல்வியையும் தழுவநேரிட்டது.

இவ்வாறான நிலையிலதான் இலங்கையில் சமாதான முயற்சிகள் ஏன் தோல்வியடைந்தன என்பதை கண்டறிவதற்காக நோர்வே அரசாங்கத்தின் ஆதரவுடன் நோர்வேயின் மைகேல்சன் நிலையம், லண்டனின் கீழ்திசை நிலையம் மற்றும் ஆபிரிக்கா கல்வி நிலையம் ஆகியன இணைந்து ஆய்வு மேற்கொண்டன அந்த ஆய்வின் முடிவுகள் நேற்று முன்தினம் வெள்ளிக்கிழமை ஒஸ்லோவில் வெளியாகியுள்ளது.

இந்த அறிக்கை வெளியிடும் நிகழ்வில் இலங்கைக்கான முன்னாள் சமாதானத் தூதுவரும்,  அமைச்சருமான எரிக்சொல்ஹெய்ம், அமெரிகக முன்னாள் வெளியுறவுத்துறை துணைச்செயலாளர் றிச்சர்ட் ஆர்மிடேச், முன்னாள் அமைச்சர் மிலிந்த மொறகொட உள்ளிட்ட பலர் கலந்துகொண்டுள்ளனர்.

208 பக்கங்களை கொண்டமைந்துள்ள இந்த அறிக்கைக்கு (Pawns of Peace) என தலைப்பிடப்பட்டுள்ளது. நோர்வே வெளிவிவகார அமைச்சின் ஆவணங்கள் மற்றும் சமாதானச் செயற்பாட்டில் ஈடுபாடுகாட்டிய முக்கியஸ்தர்களுடனான பேட்டிகள் ஆகியவற்றின் அடிப்படையில் இந்த அறிக்கை தயாரிக்கப்ட்டுள்ளது.

இலங்கையின் உள்நாட்டு யுத்தத்தை முடிவுக்கு கொண்டுவர மேற்கொள்ளப்பட்ட முயற்சிகள் மற்றும் அது தோல்வியடைந்தமைக்கான காரணங்கள் குறித்தும் இந்த அறிக்கையில் விரிவாக கூறப்பட்டுள்ளது.

இந்த அறிக்கை வெளியீட்டு நிகழ்வில் கலந்துகொண்டு உரையாற்றியுள்ள மிக்கெல்சன் நிலையத்தைச் சேர்ந்த குன்னர் சேர்போ, இலங்கையில் நோர்வே மேற்கொண்ட சமாதான முயற்சி வெற்றிபெறாமைக்கு 4 முக்கிய காரணங்களை குறிப்பிட்டுள்ளார்.

1- இலங்கையின் அரசாங்கமும், புலிகளும் சமாதான முயற்சிகளில் பஙகுகொண்டபோதும்கூட தமது நிலைப்பாடுகளை கைவிடாமலேயே இருந்தனர். இதனால் இருதரப்பினரும் அரசியல் தீர்வை காணும் செயற்பாட்டில் உளச்சுத்தியுடன் ஈடுபடவில்லை என்று கூறிவிட முடியாது. ஆனால் இந்த சமாதான முயற்சி எப்படி அரசியல் ரீதியாக நிறைவுறவேண்டும் என்று இருதரப்பினரும் அவர்கள் வரையறுத்துக்கொண்ட நிலையிலிருந்து குறிப்பிடத்தக்க அளவில் எந்தவொரு மாற்றத்தையும் செய்யவில்லை.

2-  இலங்கை நாடு மற்றும் அரசியலில் இருந்த கட்டமைப்பு ரீதியான நடைமுறைகளும் நோர்வே மேறகொண்ட சமாதான முயற்சியை பாதித்தன. இலங்கையில் நிலவிய பரம்பரை அரசியல், ஊட்கட்சிப் போட்டிகள், முக்கியமானவர்களுக்கு நன்மை செய்யும் அரசியல், தேசியவாத அணிச்சேர்ப்பு போன்றனவும் நாட்டை சீர்திருத்துவதற்கும், சர்வதேச நாடுகள் தலையிடுவதற்கும் தடங்கலாக இருந்தன.

3 - ஒரு பேச்சுவார்த்தை மூலமான தீர்வுக்கு இருந்த வாய்ப்பு என்பது மிகவும் குறுகிய வாய்ப்புதான். இராணுவ ரீதியிலான சமநிலை இருக்கும் ஒரு நிலை, மேற்கு நாடுகளோடு ஒத்த கருத்துணர்வில் இயங்கும் ஒரு அரசு இருப்பது, பல தரப்பட்ட சர்வதேச நாடுகளின் ஆதரவு பேச்சுவார்த்தைகளுக்கு இருந்தது என்று ஒரு சாதகமான சூழ்நிலை போன்றவை மிகவிரைவிலேயே மாறிவிட்டன. முக்கியமாக 2004 இல் புலிகள் இயக்கம் பிளவுண்டமையானது இராணுவ சமநிலையை அரசுக்கு சாதகமாக மாற்றியதுடன், புலிகளின் இந்த பிளவுக்கு பிறகு இருதரப்புகளுமே மற்றத் தரப்புக்கு குறிப்பிடத்தக்க சலுகைகளை காட்டவேண்டியதற்கான தேவையைக் குறைத்துவிட்டது.

4- ஐக்கிய தேசியக் கட்சியின் சமாதான வழிமுறை, பாதுகாப்பு உத்தரவாதஙகள், சர்வதேச உதவி, பொருளாதார சீர்தீருத்தங்கள் போன்றன சிங்கள தேசியவாத எதிர்விiiயை ஏற்படுத்தின. இதனால் ஒரு தேசியவாத கட்சி ஆட்சிக்கு வந்ததுடன்;, ஜனாதிபதி மஹிந்த ராஜபக்ஸ ஆசிய நாடுகளின் உதவியுடன் புதிய சர்வதேச பாதுகாப்பு வட்டத்தை தனக்காதரவாக அமைத்துக்கொண்டு புலிகள் மீது கடும் அணுகுமுறையை கைக்கொள்ள உதவியது.

மேலும் ஒரு பலவீனமான, மென்மையான நோர்வேயினால் சில இயங்கு சக்திகளை எதிர்க்க முடியவில்லை. தோலைநோக்கு திட்டம் அற்நிலையில இந்த சமாதான முயற்சி பாதிக்கப்பட்டது. இருதரப்பும் ஒப்பந்தங்களை பின்பற்றச் செய்வதற்கு நோர்வேயினால் இயலாமல் போனது.

இலங்கை அரசியலில் தான் ஒரு சதுரங்கப் பகடையாக பயன்படுத்தப்படுவதை உணர்ந்து, நோர்வே அதை தடுத்திருக்கவேண்டும். ஜெனீவா சுற்றுப்பேச்சு தோல்வியில் முடிவடந்தபோதே மத்தியஸ்த செயற்பாட்டிலிருந்து நோர்வே விலக்கிக்கொண்டிருக்க வேண்டுமெனவும், இலங்கையின் சமாதான முயற்சிகளிருந்து கற்கவேண்டிய நிறைய பாடங்கள் காணப்படுவதாகவும்  மிக்கெல்சன் நிலையத்தைச் சார்ந்த குன்னர் செர்போ மேலும் தெரிவித்துள்ளார்.

இந்தியாவுடன் நோர்வே பிரத்தியேக சந்திப்புகளை மேற்கொண்டபோது நோர்வே புலிகளின் நெருங்கிய நண்பன் என்று இந்திய தரப்பிலிருந்து விமர்சிக்கப்பட்டதாகவும், புலிகளை அவர்களின் இடத்தில் வைக்க வேண்டுமென்று கூறியதாகவும் இந்த அறிக்கையில் சுட்டிக்காட்டப்பட்டுள்ளது.

மேலும் இந்தியாவின் விடுதலைப் புலிகளுக்கு எதிரான நிலைப்பாடானது இலங்கைக்கு யுத்தத்தை கொண்டுநடாத்த பெரும் சக்தியாக இருந்ததெனவும், 2004 இல் இந்தியாவில் காங்கிரஸ் ஆட்சிப்பொறுப்பேற்றபோது அங்கு சக்திவாய்ந்த நபராக சோனியா காந்தி மாறியது திடீர் திருப்பததை ஏற்படுத்தியதாகவும், பொதுமக்களின் இழப்புகளை குறைப்பதில் இந்தியா ஆர்வம் செலுத்தியபோதும், புலிகள் தோற்கடிக்கப்பட வேண்டுமென்பதில் இந்தியா உறுதியாக செயற்பட்டதாகவும் அறிக்கையில் விபரிக்கப்பட்டுள்ளது.

இவற்றுடன் யுத்தத்தின் இறுதிக்கட்டத்தில் இந்தியாவின் பாராளுமன்றத் தேர்தலில் காங்கிரஸ் தோல்வியடைந்துவிடுமோவென்ற அச்சம் இலங்கையிடம் நிலவியதாகவும் அறிக்கையில் குறிப்பிடப்பட்டுள்ளது.

இந்த அறிக்கையில் அதிக கவனத்தைப் பெறும் விடயமாக இந்தியாவின் மத்தியமைச்சர் பா. சிதம்பரம் புலிகளின் தலைவர் பிரபாகரனுடன் தொடர்கொண்டு, முன்வரையு யோசனையை ஏற்று ஆயுதங்களை கீழே போட இணஙகுமாறு ஆலோசனை கூறியதாகவும், ஆனால் இந்நகர்வை அறிந்த வைகோ, இது காங்கிரஸின் தந்திரம் என்று நிராகரிக்குமாறும், தேர்தலில் பீ.ஜே.பி. ஆட்சியைப் பிடிக்குமென்றும் புலிகளை மீட்குமென்று அவர் உறுதி கூறியதாகவும். ஆனால் அது நடக்கவில்லையென்றும் இந்திய பாராளுமன்றத் தேர்தல் முடிவுகள் வெளியாகிக்கொண்டிருந்தபோது புலிகளின் தலைவர் பிரபாகரன் கொல்லப்பட்டிருந்தார் என்றும் நோர்வேயின் அந்த அறிக்கையில் மேலும் கூறப்பட்டுள்ளது.

இலங்கையின் உள்நாட்டு யுத்தம் முடிவடைந்து இரண்டு வருடங்கள் கடந்துவிட்ட நிலையில் வெளிவந்திருக்கும்; இந்த அறிக்கை இலங்கை அரசாங்கத்தையோ அல்லது புலிகளையே குறைகூறுவதை காட்டிலும் இந்தியாவை விமர்சிப்பதை நாம் நோக்கலாம். இதன்மறை கருத்தாக இந்தியாதான் போர்நிறுத்த ஒப்பந்தத்திற்கு குந்தகம் விளைவித்ததோ என்று சிந்திக்குமளவு அதிகளவு விடயங்கள் இந்தியாவை சுற்றி பின்னப்பட்டிருப்பதையும் அவதானிக்க முடிகிறது.

அதேவேளை இலங்கையின் உள்நாட்டு யுத்தம் நிறைவடைந்துவிட்டபின் வெளியிடப்பட்டுள்ள இந்த அறிக்கை, இலங்கை ஆட்சியாளர்கள் அரசியல் தீர்வை முன்வைப்பதிலோ அல்லது நல்லிணக்கத்தை கட்டியெழுப்புவதிலோ நோர்வேயின் பலனை பெற்றுக்கொடுக்குமா என்பதில் பலத்த சந்தேகங்கள் இருக்கவே செய்கிறது.

ஆனாலும் உலகளாவிய ரீதியில் மத்தியஸ்த்த செயற்பாடுகளில் ஈடுபட்டுள்ள நோர்வே சிலவேளைகளில், இலங்கையின் தோல்வியடைந்த சமாதான முயற்சிகளிலிருந்து பாடத்தை கற்றுக்கொள்ள சந்தர்ப்பஙகள் உண்டு எனலாம்..!

- மொஹகமத் அன்சிர்.
(ஞாயிறு தினக்குரல்)