காலங்கடத்தவா கால அவகாசம்?

ஐ.நா.வுக்குக் கொடுக்கப்பட்டுள்ள வாக்குறுதிகளை நிறைவேற்றுவதற்கு கால அவகாசம் தேவை என ஜனாதிபதி மைத்திரிபால சிறிசேன கோரிக்கைவிடுத்திருக்கின்றார். இலங்கைக்கான மூன்று நாள் விஜயத்தை மேற்கொண்டு வந்திருந்த ஐ.நா. செயலாளர் நாயகம் பான் கீ மூனுடன் நடத்திய பேச்சுக்களின் போதே இதற்கான கோரிக்கை இலங்கையினால் முன்வைக்கப்பட்டது. பான் கீ மூனும் இதனை ஏற்றுக்கொண்டிருப்பதாகவே தெரிகின்றது. "புதிய" அரசாங்கத்துக்கு கால அவகாசம் வழங்கப்பட வேண்டும் என வடமாகாண முதலமைச்சர் சி.வி.விக்னேஸ்வரனுடனான பேச்சுக்களின் போது பான் கீ மூன் தெரிவித்திருக்கின்றார். வாக்குறுதிகளை நிறைவேற்றுவதற்கான சர்வதேச ரீதியான அழுத்தங்களோ, காலக்கெடுக்களோ இனிமேல் இருக்கப்போவதில்லை என்பதைத்தான் இந்த நிகழ்வுகள் உணர்த்துகின்றன.
ஐ.நா. செயலாளர் நாயகத்தின் தற்போதைய விஜயம் ஊடகங்களில் அதிகளவுக்கு முக்கியத்துவத்தைப் பெற்றுக்கொண்டாலும், அரசியல் ரீதியான தாக்கம் எதனையும் ஏற்படுத்துவதாக அது அமையப்போவதில்லை. அவரது பதவிக்காலம் முடிவுக்கு வரப்போகின்றது. இன்னும் இரண்டு மாதங்களில் அவர் ஓய்வு பெறப்போகின்றார். இந்தக்காலப்பகுதியில் மாற்றங்களை ஏற்படுத்தக்கூடிய நகர்வுகள் எதனையும் அவரால் செய்ய முடியாது. தற்போது அவர் மேற்கொண்டிருப்பது வெறுமனே சம்பிரதாய பூர்வமான ஒரு விஜயம்தான். இதன்போது தெரிவிக்கப்படும் விடயங்கள் பதிவாக இடம்பெறுமே தவிர, அவற்றைக் கையிலெடுத்து அவர் செயற்படுத்த முற்படுவார் என்பது எதிர்பார்க்கக்கூடிய ஒன்றல்ல. இருந்தபோதிலும், அவரது விஜயத்தின்போது தெரிவிக்கப்பட்ட பல விடயங்கள் யதார்த்த நிலைமைகளை வெளிப்படையாக்கியிருக்கின்றது.
போரின் போதும் போருக்குப் பிந்தைய இந்த ஏழரை வருட காலப்பகுதியிலும் இடம்பெற்ற நிகழ்வுகளுடன் பிரிக்க முடியாத ஒருவராகவே பான் கீ மூன் இருக்கின்றார். அதன் அடிப்படையில்தான் அவரது தற்போதைய விஜயத்தைப் பார்க்க வேண்டியிருக்கின்றது. பான் கீ மூன் இலங்கைக்கு மேற்கொள்ளும் இரண்டாவது விஜயம் இது. போர் முடிவுக்கு வந்த உடனடியாக அதாவது, 2009 மே 23 ஆம் திகதி பான் கீ மூன் முதல் தடவையாக இலங்கைக்கு வந்தார். போர் இடம்பெற்ற பகுதிகளை உலங்குவானூர்தியிலிருந்தும், போரால் அகதிகளாகி முட்கம்பி வேலிக்குள் அடைக்கப்பட்டிருந்த மக்களை நேரில் சென்றும் அவர் பார்வையிட்டார். இதன் இறுதியில் அப்போதைய ஜனாதிபதி மகிந்த ராஜபக்‌ஷவுடன் இணைந்து அவர் வெளியிட்ட கூட்டறிக்கைதான் வரலாற்று முக்கியத்துவம்வாய்ந்தது. பொறுப்புக்கூறல், நல்லிணக்கம், அரசியல் தீர்வு என்பவற்றை உள்ளடக்கியதாக இந்தக்கூட்டறிக்கை அமைந்திருந்தது. போருக்குப் பிந்திய நிகழ்ச்சி நிரலை வடிவமைத்தது இந்தக்கூட்டறிக்கைதான்.
போரின்போது இடம்பெற்ற பாரிய உயிரிழப்புக்களைத் தவிர்ப்பதில் ஐ.நா. தவறியது. இதற்காகப் பயன்படுத்தக்கூடிய பொறிமுறைகள் ஐ.நா. வசம் இருந்தும் அதனைப் பயன்படுத்த ஐ.நா. தவறியது. 'R2P' எனக்குறிப்பிடப்படும் "பாதுகாப்பதற்கான பொறுப்பை" இலங்கை விடயத்தில் ஐ.நா. பயன்படுத்தாததனால்தான் ஆயிரக்கணக்கான தமிழ் மக்கள் கொடூரமான முறையில் கொல்லப்பட்டனர். இதனைப்பயன்படுத்துமாறு ஐ.நா.வுக்கு அழுத்தம் கொடுக்கப்பட்டபோது கூட போர் முடிவடையும் வரையில் ஐ.நா. வெறும் பார்வையாளராகவே இருந்தது. ஐ.நா. அமைக்கப்பட்டமைக்காகத் தெரிவிக்கப்படும் கோட்பாடே இங்கு அர்த்தமற்றதாக்கப்பட்டது. இதற்கு இரண்டு காரணங்கள் சொல்லப்படுகின்றன. ஒன்று - முன்னாள் ஜனாதிபதி மகிந்த ராஜபக்‌ஷவுடன் நெருக்கமான உறவுகளை பான் கீ மூன் வைத்திருந்தது. இரண்டு - மேற்கு நாடுகளின் நிகழ்ச்சி நிரலின்படி விடுதலைப் புலிகள் அழித்தொழிக்கப்படும் வரை மௌனமாக இருக்க ஐ.நா. விரும்பியிருக்கலாம் எனச்சொல்லப்படுகின்றது. போர் முடிவுக்கு வந்ததாக அறிவிக்கப்பட்ட ஐந்தாவது தினம்தான் ஐ.நா. செயலாளர் நாயகம் இலங்கை வந்திருந்தார்.
போரின்போது ஏற்பட்ட பாரிய இழப்புக்களைத் தடுப்பதற்குத் தவறிவிட்ட குற்றவுணர்வும், மனித உரிமை அமைப்புக்களின் கடுமையான கண்டனங்களும்தான் மகிந்த ராஜபக்‌ஷவுடன் கூட்டறிக்கை ஒன்றை வெளியிடுவதற்கு பான் கீ மூனைத் தூண்டிய காரணிகளாக இருந்தன. போரின் போது ஏற்பட்ட பாரிய உயிரிழப்புக்களைத் தவிர்க்க ஐ.நா. தவறிவிட்டதை இப்போது மூன் பகிரங்கமாகவே ஒப்புக்கொண்டிருக்கின்றார். ராஜபக்‌ஷ - மூன் கூட்டறிக்கையின் அடிப்படையில்தான் ஜெனீவா தீர்மானங்கள் கொண்டுவரப்பட்டன. அந்தக் கூட்டறிக்கைதான் கடந்த ஏழரை ஆண்டுகாலத்துக்கான நிகழ்ச்சி நிரலை உருவாக்கியது. போர் முடிவுக்கு வந்து இன்று ஏழரை வருடங்கள் சென்றுள்ள போதிலும், கொடுக்கப்பட்ட வாக்குறுதிகள் எதுவும் முழுமையாக நிறைவேற்றப்படவில்லை. இடம்பெயர்ந்த மக்களில் ஒரு பகுதியினர் இப்போதும் முகாம்களுக்குள்தான் இருக்கின்றார்கள். தற்காலிகமாக அமைக்கப்பட்டிருந்த இராணுவ முகாம்கள் பல இன்று நிரந்தர முகாம்களாக்கப்படுகின்றன. இதனை இராணுவம் செய்கின்றது எனச் சொல்லிக்கொண்டாலும் கூட இதற்கான நிதியை அரசாங்கம்தானே வழங்குகின்றது?
இந்த நிலையில் கால அவகாசம் வழங்குமாறு ஜனாதிபதி கேட்பதும், அதனை வழங்குமாறு ஐ.நா. செயலாளர் நாயகம் தமிழ்த் தரப்புக்கு ஆலோசனை வழங்குவதும் சந்தேகத்தை ஏற்படுத்துவதாகவே இருக்கின்றது. நிரந்தர இராணுவ முகாம்களை அமைப்பதிலும், சிங்களவர்களே வசிக்காத பகுதிகளில் புத்தர் சிலைகளைக் குடியேற்றுதில் காட்டப்படும் அவசரத்தை தமிழர்களின் மீள்குடியேற்றத்தில் காட்டப்படுவதில்லை என்பது வெளிப்படையாகவே தெரிகின்றது. ஜனாதிபதியாக மைத்திரிபால பதவியேற்று ஒன்றரை வருடங்கள் சென்றுவிட்டது. புதிய அரசாங்கம் பதவியேற்று ஒரு வருடம் தாண்டிவிட்டது. எந்தவொரு அரசாங்கமும் பதவிக்கு வந்து ஒரு வருடத்துக்குள் சிக்கலான பிரச்சினைகளுக்குத் தீர்வைக்கண்டுவிட வேண்டும். இல்லையெனில் எதிர்க்கட்சிகள் பலம் பெறுவதும், அடுத்த தேர்தலை இலக்கு வைத்த செயற்பாடுகளில் இறங்குவதுதம்தான் வழமையாகிவிடும். இப்போதும் அவ்வாறுதான் நடைபெறப்போகின்றதா என்ற சந்தேகம் ஏற்படுவதைத் தவிர்க்க முடியவில்லை. காலஅவகாசம் காலங்கடத்தலுக்காக இருக்கக்கூடாது.
04-09-2016 Thinakkural